Detaje të reja janë bërë publike lidhur me aksidentin tragjik ku humbi jetën gazetari Enrik Mehmeti në zonën e Zvërnecit, mbrëmjen e së shtunës.
Gazetarja e Vlorës, Afrovita Hysaj, në një prononcim për RTSH, tha se ngjarja ngre disa pikëpyetje, pasi Mehmeti kishte udhëtuar drejt Zvërnecit vetëm dhe pa njoftuar familjarët apo miqtë, ndryshe nga sa vepronte zakonisht kur lëvizte me grupin e tij shoqëror.
Sipas saj, edhe vëllai i gazetarit, Fabio Mehmeti, nuk kishte dijeni për këtë udhëtim. Hysaj bëri të ditur se pas aksidentit Enriku kishte arritur ta telefononte të vëllanë, duke i kërkuar të nxitonte drejt vendit të ngjarjes për ta ndihmuar.
Ndërkohë, hetimet vijojnë për të zbardhur plotësisht rrethanat e aksidentit. Burime bëjnë me dije se 18-vjeçari që ndodhej me të dhe mbeti i plagosur lehtë ka dhënë deklarime të paqarta përpara grupit hetimor lidhur me dinamikën e ngjarjes.
Enrik Mehmeti humbi jetën pasi u godit nga një pjesë metalike e mjetit tip motor me katër goma (ATV) me të cilin po udhëtonte në zonën e Zvërnecit.a.b
