Pas grumbullimit në Sheshin “Skënderbej”, protestuesit nisën marshimin drejt godinës së Kryeministrisë, në kuadër të protestës së 52-të radhazi kundër qeverisë.
Gjatë marshimit, qytetarët hodhën thirrje si “Arrestoni Ramën” dhe “Shqipëria kërkon revolucion”, duke përsëritur kërkesën për dorëheqjen e kryeministrit Edi Rama dhe largimin e qeverisë.
Nga podiumi, aktivisti Andi Tepelena deklaroi se lëvizja qytetare po fiton gjithnjë e më shumë mbështetje ndërkombëtare. Sipas tij, pas reagimeve të eurodeputetëve, protesta është mbështetur edhe nga Internacionalja e Partive të Djathta Europiane, ndërsa shtoi se jehona e zhvillimeve në Shqipëri po shtrihet përtej kufijve të vendit.
Tepelena iu referua edhe deklaratave të një eurodeputeti, i cili, sipas tij, ka ngritur akuza se kryeministri Rama pastron para përmes familjarëve të tij. Ai i bëri thirrje SPAK-ut të nisë hetime për këto pretendime.
Në përfundim të fjalës së tij, aktivisti falënderoi qytetarët që udhëtojnë nga zona të ndryshme të vendit për t’iu bashkuar protestës, duke theksuar se lëvizja synon një Shqipëri me më shumë drejtësi, ku, sipas tij, të rinjtë të mos detyrohen të emigrojnë dhe prona t’u kthehet pronarëve të ligjshëm.
