Tensione të forta janë shënuar paraditen e sotme përpara Kuvendit të Shqipërisë, ku qytetarë të shumtë janë mbledhur në protestë për të shprehur pakënaqësinë ndaj qeverisë dhe klasës politike.
Sipas protestuesve, disa ministra dhe deputetë kanë shmangur hyrjen nga porta kryesore e Kuvendit, duke përdorur hyrje alternative për të mos u përballur me qytetarët e grumbulluar jashtë godinës. Gjatë protestës, drejt disa prej zyrtarëve janë hedhur vezë, megjithëse distanca e konsiderueshme nuk ka lejuar që ato t’i godasin.
Tubimi nisi rreth orës 10:30 dhe u shoqërua me thirrje të vazhdueshme kundër qeverisë. “Parlamenti i krimit”, “Rama jep dorëheqjen”, “Nuk na përfaqësoni”, “Arrestoni Ramën”, “Arresto Ballukun” dhe “Parlament analfabet” ishin disa nga sloganet e dëgjuara gjatë protestës.
Me kalimin e minutave, protestuesit u zhvendosën drejt hyrjes kryesore të Kuvendit, ku pritej mbërritja e deputetëve për seancën parlamentare.
Në zonë është vendosur një prani e shtuar e forcave të Policisë së Shtetit, ndërsa perimetri i institucionit është rrethuar me barriera metalike. Efektivë të Forcave të Ndërhyrjes së Shpejtë kanë ndjekur nga afër lëvizjet e protestuesve. a.b
