Kryeministri Edi Rama ka reaguar pas publikimit të raportit Environmental Performance Index 2026, duke theksuar se Shqipëria është renditur e para në Ballkanin Perëndimor për performancën mjedisore dhe ka shënuar progresin më të madh në rajon gjatë dekadës së fundit.
Në një reagim të gjatë, kreu i qeverisë tha se raporti ndërkombëtar rrëzon, sipas tij, perceptimin e krijuar gjatë javëve të fundit se Shqipëria ishte kthyer në një vend që po dëmtonte mjedisin. Rama theksoi se vlerësimi vjen nga institucione dhe ekspertë ndërkombëtarë, të cilët matin prej vitesh performancën mjedisore të shteteve me të njëjtën metodologji.
Kryeministri nënvizoi se Shqipëria renditet e 46-ta mes 177 vendeve të botës, ndërsa për zbutjen e ndryshimeve klimatike mban vendin e 21-të në rang global.
Rama e cilësoi këtë rezultat si një tregues të transformimit të vendit në fushën e mbrojtjes së mjedisit, duke kujtuar se jo shumë vite më parë Shqipëria përballej me prerje masive pyjesh, gjueti të paligjshme, ndotje të lumenjve dhe mungesë të mekanizmave shtetërorë për mbrojtjen e natyrës.
Sipas tij, sot vendi ndodhet në një realitet krejtësisht tjetër, ndërsa vetë fakti që qytetarët organizojnë protesta për çështje mjedisore tregon një nivel më të lartë ndërgjegjësimi shoqëror.
Ai vlerësoi angazhimin qytetar për mbrojtjen e natyrës, duke theksuar se një shoqëri që debaton për pyjet, lagunat dhe biodiversitetin është një shoqëri më e zhvilluar sesa ajo që hesht përballë shkatërrimit të mjedisit.
Megjithatë, kryeministri pranoi se qeveria nuk ka qenë e pagabueshme dhe se ka ende shumë punë për të bërë në këtë drejtim. Ai tha se raporti nuk duhet parë si një arsye për vetëkënaqësi, por si një përgjegjësi për të dëgjuar më shumë, për të reflektuar dhe për të korrigjuar gabimet kur ato evidentohen.
Rama theksoi se zhvillimi ekonomik dhe mbrojtja e mjedisit nuk duhet të konsiderohen si objektiva që përjashtojnë njëri-tjetrin, por si procese që duhet të ecin paralelisht.
Ai shtoi se qeveria do të vijojë të punojë për të ruajtur ekuilibrin mes zhvillimit dhe natyrës, duke u mbështetur tek faktet dhe jo tek debatet politike.
