Protesta kundër qeverisë së kryeministrit Edi Rama ka vijuar edhe këtë të diel, duke shënuar ditën e 51-të radhazi. Pas grumbullimit, qytetarët nisën marshimin drejt Kryeministrisë, ndërsa gjatë tubimit u dëgjuan thirrje si “Arresto Ballukun” dhe “Rama jep dorëheqjen”.
Organizatorët e cilësuan protestën si një moment të rëndësishëm të rezistencës qytetare, ndërsa kërkesa kryesore mbetet largimi i qeverisë dhe dorëheqja e pakushtëzuar e kryeministrit Edi Rama.
Nga podiumi, aktivisti Edison Lika u bëri thirrje qytetarëve të marrin pjesë edhe në protestën e paralajmëruar për më 23 korrik para Kuvendit të Shqipërisë. Ai akuzoi deputetët se nuk përfaqësojnë qytetarët, por interesat e krimit të organizuar dhe oligarkisë, duke pretenduar se ndryshimet në kalendarin e seancave parlamentare lidhen me frikën nga reagimi qytetar.
Lika deklaroi se, nëse do të zhvillohet seanca plenare e 23 korrikut, protestuesit do të jenë para Parlamentit për të shprehur kundërshtimin e tyre ndaj klasës politike.
Gjatë protestës foli edhe një qytetar, i cili u ngjit në podium së bashku me vajzën e tij të vogël. Ai tha se ishte detyruar të emigronte në Gjermani në vitin 2015 për shkak të mungesës së shpresës në Shqipëri dhe kërkoi dorëheqjen e kryeministrit Rama.
Tubimi u zhvillua nën praninë e forcave të policisë dhe vijoi pa incidente, ndërsa protestuesit marshuan drejt godinës së Kryeministrisë duke përsëritur thirrjet kundër qeverisë.
