Policia e Lushnjës ka finalizuar operacionin e koduar “Again”, duke zbardhur dy raste vjedhjeje të ndodhura brenda dy ditësh dhe duke vënë në pranga autorin e dyshuar, një 36-vjeçar me precedent penal për vjedhje.
Në pranga ka rënë shtetasi M. G., 36 vjeç, banues në fshatin Plug, Lushnjë.
Sipas hetimeve, ai dyshohet se më 16 korrik ka vjedhur dy bateri automjetesh në fshatin Plug. Ndërsa një ditë më vonë, në orët e para të mëngjesit, dyshohet se ka hyrë në një lokal në të njëjtin fshat, ku ka marrë një shumë parash dhe një laptop, e më pas i ka vënë zjarrin objektit, duke shkaktuar dëme të konsiderueshme materiale.
Policia bën me dije se 36-vjeçari ishte dënuar edhe më parë për veprën penale të vjedhjes.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme.
