Policia e Tiranës ka finalizuar operacionin e koduar “Illegal Trade”, në kuadër të të cilit u kontrolluan tetë subjekte tregtare që ushtronin aktivitet në fushën e shitjes së pajisjeve elektronike, veshjeve dhe aksesorëve të markave luksoze.
Sipas Policisë, gjatë kontrolleve u konstatuan produkte të dyshuara të kontrabanduara, ndërsa u proceduan penalisht nëntë administratorë ose përfaqësues të këtyre bizneseve, pasi dyshohet se nuk deklaronin të ardhurat nga aktiviteti tregtar.
Gjatë operacionit u sekuestruan 16 telefona celularë, 10 njësi kompjuterike, një laptop, si dhe 11 çanta dhe artikuj veshjeje të markave luksoze, të cilat nuk ishin të shoqëruara me dokumentacion që provonte origjinën dhe zhdoganimin e tyre.
Nga verifikimet rezultoi gjithashtu se të ardhurat nga shitja e këtyre produkteve nuk deklaroheshin pranë organeve tatimore. Ndërkohë, në një prej subjekteve u konstatua se shiteshin mallra pa lëshuar kupon tatimor, ndaj u vendos pezullimi i ushtrimit të aktivitetit.
Në përfundim të veprimeve procedurale, nisi procedimi penal ndaj shtetasve me iniciale Gj. H., N. R., S. S., A. D., B. D., A. L., A. L., K. Gj. dhe J. B., në cilësinë e administratorëve ose përfaqësuesve të subjekteve.
Materialet procedurale i janë referuar Prokurorisë për veprime të mëtejshme.a.b
