Sekuestrimi nga SPAK i vilës së dytë luksoze të Belinda Ballukut në Palasë ka rikthyer në vëmendje lidhjet mes ish-zv.kryeministres dhe biznesmenit Arbër Abazi, si dhe mënyrën e financimit të investimit në pronën bregdetare.
Sipas detajeve të bëra publike nga gazetarja Klodiana Lala në emisionin “Minuta e Parë” në News24, vila ka një vlerë blerjeje mbi 400 mijë euro, ndërsa investimi shtesë për punimet dhe elementët luksozë të saj ka kaluar 250 mijë euro. Pjesë të këtij investimi janë marrë përsipër nga Arbër Abazi, biznesmeni i kompanisë “Alko Impex”.
Hetimi i SPAK, sipas Lalës, është shtrirë te vilat në zonën e Palasës pas zbërthimit të telefonave dhe komunikimeve elektronike. Në materialet e hetimit janë evidentuar të dhëna që, sipas saj, lidhin investimin në vilë me biznesmenin Arbër Abazi.
Një prej elementeve që pasuroi dosjen lidhet me punimet e pishinës. Sipas Lalës, në dokumentet e mbikëqyrjes dhe porosive për materialet është shënuar me shkrim “Arbër Abazi + Balluku”, duke krijuar dyshime për lidhjen e drejtpërdrejtë të biznesmenit me investimin në pronën e ish-zv.kryeministres.
Abazi është përmendur në kontekstin e kontratave dhe tenderave publikë të kompanisë “Alko Impex” me institucione në varësi të Ministrisë së Infrastrukturës.
Gazetarja Klodiana Lala ka argumentuar se hetimi duhet të shtrihet përtej Ballukut dhe të verifikojë edhe rolin e kryeministrit Edi Rama. Sipas saj, në materialet e hetimit ekzistojnë komunikime ku përmendet emri i Ramës në lidhje me udhëzime që Balluku të zhvillonte takime me biznesmenë të caktuar për çështje që lidhen me tenderat publikë.
Për këtë arsye, Lala ka kërkuar që SPAK të marrë në pyetje edhe kryeministrin për rolin e tij të mundshëm në vendimmarrjet që lidhen me kompanitë përfituese të kontratave publike, veçanërisht në rastin e tenderit për tunelin e Llogarasë.
SPAK ka sekuestruar vilën, pasi ka konstatuar se punimet e kryera nga Arbër Abazi kanë lidhje mes këtij investimi dhe kontratave publike të kompanisë.m.k
