Gazetari i njohur vlonjat Enrik Mehmeti ka humbur jetën mbrëmjen e së shtunës në një ngjarje aksidentale të ndodhur në zonën e Dajlanit, në Vlorë.
Mehmeti, rreth 40 vjeç, ishte reporter prej afro 20 vitesh për media të ndryshme, duke mbuluar kryesisht zhvillimet dhe aktualitetin në qarkun e Vlorës.
Sipas informacionit paraprak të Policisë, rreth orës 21:40, ai po lëvizte me një motomjet me katër rrota në një sipërfaqe bregdetare jashtë zonës rrugore, kur dyshohet se humbi kontrollin e mjetit, i cili u përmbys.
Si pasojë e aksidentit, gazetari pësoi dëmtime të rënda. Ai u transportua me urgjencë në Spitalin Rajonal të Vlorës, por nuk mundi t’u mbijetonte plagëve, pavarësisht përpjekjeve të mjekëve.
Në motomjet ndodhej edhe një 18-vjeçar me inicialet K. S., i cili ka pësuar dëmtime të lehta dhe ndodhet jashtë rrezikut për jetën.
Nga verifikimet paraprake rezulton se ngjarja ka ndodhur jashtë rrugës dhe nuk janë përfshirë mjete të tjera apo përdorues të rrugës.
Grupi hetimor, nën drejtimin e Prokurorisë, vijon veprimet për zbardhjen e plotë të rrethanave dhe përcaktimin e shkakut të aksidentit.
Redaksia e droni.al shpreh ngushëllimet më të sinqerta dhe më të thella për familjen, të afërmit, miqtë dhe kolegët e Enrik Mehmetit, duke u uruar forcë për të përballuar këtë humbje të rëndë.a.b
