Protesta qytetare para Kryeministrisë vijoi edhe këtë të premte, duke shënuar ditën e 49-të radhazi. Në tubim morën pjesë qytetarë dhe aktivistë, të cilët përsëritën kërkesat drejtuar qeverisë dhe bënë thirrje për vijimin e protestave.
Një nga aktivistet deklaroi se kërkesa kryesore mbetet dorëheqja e kryeministrit Edi Rama dhe e qeverisë, si dhe krijimi i një qeverie tranzitore me mandat 12-mujor, e cila, sipas saj, do të ndërmarrë ndryshime kushtetuese për të garantuar barazinë e qytetarëve para ligjit.
Ajo përmendi gjithashtu ndryshimin e Kodit Zgjedhor dhe të ligjit për financimin e partive politike, kufizimin e mandatit të kryeministrit në jo më shumë se dy mandate, si dhe shfuqizimin e ligjeve që lidhen me zonat e mbrojtura, trashëgiminë kulturore, “Paketën e Maleve” dhe investimet strategjike.
Gjatë protestës u bë thirrje për mobilizim qytetar dhe pjesëmarrje në tubimin e paralajmëruar për më 23 korrik, përpara Kuvendit.
Një protestuese u bëri thirrje qytetarëve të mos tërhiqen dhe të bashkohen në protestë deri në arritjen e objektivave të shpallura nga organizatorët.
“Më 23 korrik, në orën 09:00, para Parlamentit. Duhet të tregojmë që jemi bashkë”, u shpreh ajo, ndërsa bëri thirrje për pjesëmarrje në protestën e radhës.
Protesta para Kryeministrisë vijon prej 49 ditësh, ndërsa organizatorët kanë paralajmëruar vazhdimin e tubimeve edhe në ditët në vijim.a.b
