Kryetari i Partisë Demokratike, Sali Berisha, gjatë një komunikimi në rrjetet sociale me ndjekësit e tij, akuzoi kryeministrin Edi Rama se po e paraqet forcimin e lekut si sukses ekonomik, ndërsa, sipas tij, zhvlerësimi i euros lidhet me hyrjen e parave të drogës në ekonominë shqiptare.
Duke iu përgjigjur një pyetjeje mbi rënien e euros dhe debatet për të ashtuquajturën “narko-euro”, Berisha deklaroi se ky fenomen ka dëmtuar rëndë ekonominë, duke çuar në falimentimin e industrive eksportuese dhe humbjen e vendeve të punës.
Sipas kreut të opozitës, zhvlerësimi i euros ka goditur veçanërisht sektorët e fasonerisë, këpucëve dhe tekstileve, duke bërë që shumë biznese të mbyllen dhe mijëra punonjës të largohen nga vendi. Ai pretendoi se rënia e eksporteve është pasojë e mbiçmimit të lekut dhe akuzoi qeverinë se përpiqet ta maskojë këtë situatë përmes mënyrës së raportimit të të dhënave ekonomike.
Berisha kundërshtoi deklaratat e kryeministrit se forcimi i lekut është shenjë e një ekonomie të fortë, duke sjellë si shembull Norvegjinë. Sipas tij, edhe pse Norvegjia ka një nga ekonomitë më të fuqishme në botë dhe një fond sovran investimesh që tejkalon 1 trilion euro, monedha e saj nuk është forcuar përkundrazi, sipas Berishës, korona norvegjeze është zhvlerësuar me 10 deri në 12 për qind gjatë dekadës së fundit, madje në disa periudha edhe deri në 16 për qind.
Në kontrast me këtë, Berisha tha se leku shqiptar është mbiçmuar me rreth 35 për qind, duke pretenduar se kjo nuk është rezultat i zhvillimit ekonomik, por i hyrjes së parave të drogës në vend.
Në përfundim, kreu i PD-së e cilësoi atë që e quan “narko-euro” si një nga faktorët më të dëmshëm për ekonominë dhe të ardhmen e Shqipërisë, ndërsa akuzoi kryeministrin Rama se po e paraqet këtë fenomen si sukses të qeverisjes.
Deklaratat e Berishës vijnë një ditë pasi kryeministri Edi Rama mbrojti forcimin e monedhës kombëtare, duke e cilësuar atë si pasojë të rritjes ekonomike, turizmit dhe hyrjes së valutës në vend.
