Një operacion shpëtimi u zhvillua mëngjesin e së premtes në veri të ishullit të Sazanit, ku 11 emigrantë nga vende të ndryshme rrezikonin të mbyteshin pasi lëviznin me një gomone të vogël që kishte mbetur me sasi të pamjaftueshme karburanti.
Sipas Policisë Kufitare, rreth orës 07:30 shërbimet e Drejtorisë Vendore për Kufirin dhe Migracionin Vlorë morën një telefonatë nga një numër grek, përmes së cilës u sinjalizua se disa persona ndodheshin në rrezik në det.
Menjëherë pas njoftimit, shërbimet e Policisë Kufitare, në bashkëpunim me Rojen Bregdetare dhe Guardia di Finanza (GDF), u nisën drejt zonës së sinjalizuar dhe arritën të lokalizonin gomonen.
Si rezultat i operacionit, të 11 emigrantët u nxorën në breg në gjendje të mirë shëndetësore.
Nga verifikimet paraprake ka rezultuar se mjeti lundrues ishte një gomone rreth 3 metra e gjatë, e pajisur me motor 25 kuaj fuqi, ndërsa në serbator kishte një sasi të vogël karburanti, të pamjaftueshme për lundrim.
Policia bën të ditur se monitorimi me radar i hapësirës detare ka treguar se gjatë 48 orëve të fundit nuk është konstatuar asnjë tentativë e mjeteve lundruese për të lëvizur drejt ujërave ndërkombëtare.
Ndërkohë, grupi i posaçëm hetimor, nën drejtimin e Prokurorisë, po vijon hetimet për të sqaruar plotësisht rrethanat e këtij rasti dhe për të dokumentuar ngjarjen me prova ligjore.a.b
