Policia e Elbasanit ka nisur procedim penal ndaj dy personave, të dyshuar për kanosjen e gazetarit Osman Stafa gjatë ushtrimit të detyrës.
Sipas njoftimit zyrtar, specialistët për Hetimin e Krimeve të Komisariatit të Policisë Elbasan, nën drejtimin e Prokurorisë, kanë nisur procedimin penal për veprën penale “Kanosja për shkak të detyrës” ndaj shtetasve R. T., 33 vjeç, banues në Tiranë, dhe A. B., 31 vjeç, banues në Librazhd.
Ngjarja ka ndodhur rreth orës 14:00 të datës 17 korrik, kur gazetari Osman Stafa ka njoftuar Sallën Operative të Policisë se, gjatë lëvizjes në aksin rrugor Librazhd–Elbasan, ishte ndjerë i kanosur nga dy persona që udhëtonin me një automjet.
Pas kryerjes së veprimeve të para hetimore dhe administrimit të provave, Policia vendosi nisjen e procedimit penal ndaj dy shtetasve.
Materialet procedurale i janë referuar Prokurorisë, e cila do të vijojë me veprimet e mëtejshme hetimore.
