Nënkryetari i Partisë Demokratike, Belind Këlliçi, bëri të ditur se Internacionalja Demokrate e Qendrës (Centrist Democrat International – CDI), organizata më e madhe ndërkombëtare e qendrës së djathtë me 115 parti anëtare nga 83 shtete, ka miratuar një deklaratë për situatën politike në Shqipëri gjatë punimeve të Asamblesë së Përgjithshme të zhvilluar në Bruksel.
Sipas Këlliçit, delegacioni i Partisë Demokratike, i kryesuar nga Sali Berisha, informoi pjesëmarrësit mbi zhvillimet politike në vend, protestat qytetare që sipas tij kanë hyrë në ditën e 48-të, si dhe kërkoi ngritjen e një grupi pune për të dokumentuar lidhjet e pretenduara të qeverisë shqiptare me krimin e organizuar dhe kartelet e drogës. Ai tha se propozimi u mirëprit, së bashku me idenë për organizimin e një konference ndërkombëtare mbi atë që opozita e cilëson “narkoshtet” në Shqipëri.
Në deklaratën e miratuar, CDI shpreh shqetësim për përkeqësimin e demokracisë, shtetit të së drejtës dhe funksionimit të institucioneve demokratike në Shqipëri, duke iu referuar raporteve dhe vlerësimeve ndërkombëtare.
Organizata shpreh gjithashtu solidaritet me opozitën dhe qytetarët që protestojnë në mënyrë paqësore, duke theksuar se e drejta për protestë, liria e shprehjes dhe pjesëmarrja politike janë liri themelore që duhet të mbrohen.
Në deklaratë u bëhet thirrje autoriteteve shqiptare të angazhohen në dialog demokratik, të zbatojnë rekomandimet ndërkombëtare për reformën zgjedhore, të garantojnë kushte të barabarta për konkurrencën politike dhe të ndalin çdo formë presioni ndaj protestuesve, gazetarëve dhe përfaqësuesve të shoqërisë civile.
CDI, sipas deklaratës, rikonfirmon angazhimin për të mbështetur popullin shqiptar në përpjekjet për demokraci, pluralizëm, shtetin e së drejtës dhe vlerat demokratike. a.b
