Një atentat me armë zjarri u regjistrua mbrëmjen e së premtes në lagjen nr. 4 të Sarandës, ku mbeti i plagosur 50-vjeçari Thimjo Rubati, i njohur edhe me identitetin Sandër Rubati.
Sipas të dhënave paraprake, dy persona të maskuar, që lëviznin me një motomjet, kanë qëlluar disa herë në drejtim të Rubatit dhe më pas janë larguar me shpejtësi nga vendngjarja.
Si pasojë e të shtënave, 50-vjeçari ka marrë tre plagë nga armë zjarri. Fillimisht ai u transportua në spitalin e Sarandës, ndërsa më pas u nis me urgjencë drejt Spitalit të Traumës në Tiranë për mjekim të specializuar.
Sipas burimeve, Rubati është një person me precedentë penalë, i njohur nga autoritetet për vepra që lidhen me trafikimin e emigrantëve të paligjshëm, kontrabandën, armëmbajtjen pa leje dhe trafikimin e mjeteve motorike.
Atentati ndodhi vetëm pak metra larg vendit ku një natë më parë u dhunua efektivi i Policisë, Mihal Velço. Për atë ngjarje dyshohet se janë përfshirë djali i Rubatit dhe dy persona të tjerë, të cilët gjithashtu rezultojnë me precedentë penalë.
Policia ka rrethuar zonën dhe ka ngritur pika kontrolli për identifikimin dhe kapjen e autorëve, ndërsa hetimet po vijojnë për të zbardhur rrethanat e atentatit dhe për të verifikuar nëse dy ngjarjet e ndodhura brenda pak orësh kanë lidhje mes tyre.m.k
