Protesta e 48-të radhazi para Kryeministrisë u shoqërua me thirrje për pjesëmarrje masive në tubimin e 23 korrikut, ditë që përkon me seancën e fundit plenare të këtij sesioni parlamentar.
Njëri prej organizatorëve të protestës, Edison Lika, u bëri thirrje qytetarëve të mblidhen para Kuvendit, duke deklaruar se seanca e 23 korrikut do të jetë e fundit për deputetët aktualë.
“Më 23 korrik do të jetë seanca e fundit plenare. Por ajo do të jetë seanca e fundit për ata, pasi nuk do të kthehen më në Kuvend. Kush e vendos? E vendosni ju. Këtu vendosim ne”, u shpreh Lika.
Gjatë tubimit, një tjetër aktivist u bëri thirrje qytetarëve të mos tërhiqen nga protesta dhe të vijojnë presionin ndaj klasës politike, duke deklaruar se kjo nuk është koha për pushime, por për mobilizim qytetar.
Ai tha se lëvizja synon të vendosë një standard të ri përgjegjshmërie politike, duke kërkuar që drejtësia të veprojë ndaj të gjithë zyrtarëve që kanë shkelur ligjin.
Në protestë foli edhe një i ri, i cili deklaroi se prej 48 ditësh qytetarët protestojnë për të kundërshtuar, sipas tij, një Parlament që nuk i përfaqëson dhe për të kërkuar dorëheqjen e qeverisë.
Protestuesit vijuan edhe këtë mbrëmje të kërkojnë largimin e kryeministrit Edi Rama dhe plotësimin e kërkesave të paraqitura nga organizatorët e lëvizjes.
