Kryetari i Grupit Parlamentar të Partisë Demokratike, Gazment Bardhi, reagoi pas publikimit të Raportit të Komisionit Europian për Sundimin e Ligjit për vitin 2026, duke deklaruar se dokumenti ngre shqetësime për trajtimin e çështjes së zëvendëskryeministres Belinda Balluku dhe për fenomenin e pandëshkueshmërisë në Shqipëri.
Në një deklaratë për mediat, Bardhi tha se raporti e konsideron refuzimin e Kuvendit për të miratuar kërkesën e SPAK-ut për heqjen e imunitetit të Ballukut si një çështje që prek parimet e barazisë para ligjit dhe balancës mes pushteteve.
Sipas deputetit demokrat, raporti evidenton gjithashtu ndryshimet e propozuara në Kodin e Procedurës Penale, të cilat, sipas tij, mund të ndikojnë në hetimet për korrupsionin e nivelit të lartë dhe të favorizojnë pandëshkueshmërinë.
Bardhi vlerësoi se raporti mbështet qëndrimin e opozitës në lidhje me këtë çështje dhe i bëri thirrje Prokurorisë së Posaçme që të veprojë pa vonesë.
Sipas tij, nëse SPAK vlerëson se janë rënduar dyshimet penale ndaj Belinda Ballukut, atëherë duhet t’i drejtohet Kuvendit me kërkesë për heqjen e imunitetit dhe arrestimin e saj, në përputhje me standardet që vetë institucioni ka deklaruar më herët.
Reagimi i Bardhit vjen pas publikimit të Raportit të Komisionit Europian për Sundimin e Ligjit për vitin 2026, i cili analizon zhvillimet në fushën e shtetit të së drejtës në vendet anëtare dhe ato kandidate për anëtarësim në Bashkimin Europian.m.k
