Komisioni i Posaçëm për Reformën Territoriale ka përmbyllur fazën e tij të punës, ndërsa Partia Socialiste pritet të propozojë një hartë të re administrative që parashikon uljen e numrit të bashkive në vend nga 61 aktualisht në rreth 40 deri në 50 njësi vendore.
Sipas burimeve, në mbledhjen e zhvilluar këtë të martë në Kuvend nuk u arrit konsensus për rendin e ditës, duke e mbyllur kështu procesin e diskutimeve në komision pa një dakordësi mes palëve.
Të njëjtat burime bëjnë me dije se mazhoranca do të paraqesë propozimin e saj vetëm për hartën e re territoriale, ku do të përcaktohet numri dhe organizimi i bashkive në shkallë vendi.
Miratimi i hartës së re territoriale pritet të hidhet për votim më 23 korrik. Më pas, gjatë sesionit të ri parlamentar, Kuvendi do të shqyrtojë ndryshimet në ligjin për vetëqeverisjen vendore dhe në ligjin për financat vendore, të cilat lidhen me zbatimin e ndarjes së re administrative.
Nëse propozimi miratohet, Shqipëria do të ketë rreth 10 deri në 20 bashki më pak se aktualisht, duke shënuar një tjetër reformë të rëndësishme në organizimin e pushtetit vendor. a.b
