Kryeministri Edi Rama ka shprehur ngushëllimet për ndarjen nga jeta të Atit Emir të Katarit, Sheikh Hamad bin Khalifa Al Thani, duke e cilësuar atë një burrë shteti vizionar dhe një udhëheqës historik që ndryshoi rrënjësisht zhvillimin e vendit të tij.
Në një mesazh publik, Rama vlerësoi kontributin e tij në transformimin e Katarit, duke theksuar se ai hodhi themelet e një prej proceseve më të jashtëzakonshme të zhvillimit kombëtar në kohët moderne.
Sipas kreut të qeverisë, vizioni i Atit Emir, i vijuar nga Emiri aktual, Sheikh Tamim bin Hamad Al Thani, e ka shndërruar Katarin në një model frymëzimi, që ka arritur të ndërthurë zhvillimin e shpejtë me ruajtjen e identitetit, trashëgimisë dhe kulturës së tij.
Rama nënvizoi gjithashtu marrëdhëniet miqësore mes Shqipërisë dhe Katarit, duke theksuar se të dy vendet ndajnë një bashkëpunim në rritje, të bazuar në respekt të ndërsjellë. Ai vlerësoi angazhimin e Katarit në fushat e kulturës, arsimit, dialogut dhe mbrojtjes së trashëgimisë.
Në emër të popullit shqiptar dhe në emrin e tij personal, kryeministri u shprehu ngushëllimet Emirit Sheikh Tamim bin Hamad Al Thani, familjes Al Thani, Kryeministrit dhe Ministrit të Jashtëm Sheikh Mohammed bin Abdulrahman bin Jassim Al Thani, si edhe popullit të Katarit.
“U prehtë në paqe të përjetshme shpirti i Lartmadhërisë së Tij, Atit Emir, dhe vizioni e trashëgimia e tij vazhdofshin të frymëzojnë Katarin dhe brezat që do të vijnë”, përfundon mesazhi i Ramës. a.b
