Një nismë solidariteti është ndërmarrë në mbështetje të Altin Hilës, i cili prej 32 ditësh ka marrë pjesë në protestat qytetare së bashku me djalin e tij të paralizuar.
Organizatorët e nismës kanë bërë të ditur se fondet po mblidhen për të ndihmuar familjen e Hilës dhe për të lehtësuar situatën e tyre ekonomike. Sipas tyre, brenda vetëm tre orësh janë mbledhur rreth 50 mijë euro.
Në thirrjen publike për mbështetje thuhet se donacionet po koordinohen përmes kontaktit të drejtpërdrejtë me bashkëshorten e Altin Hilës.
Altin Hila u përfshi në ngjarjet e protestës së zhvilluar gjatë ditës së sotme, ku, sipas organizatorëve dhe pjesëmarrësve në tubim, ai u godit me shkop gome nga efektivët e Policisë së Shtetit dhe u tërhoq zvarrë nga disa policë.
Hila është bërë i njohur gjatë protestave pasi çdo ditë ka marrë pjesë në to së bashku me djalin e tij të paralizuar, të cilin e shoqëron me karrocë, duke kërkuar më shumë mbështetje dhe vëmendje për familjet që përballen me situata të ngjashme.
