Seanca gjyqësore në themel në Gjykatën e Posaçme kundër Korrupsionit dhe Krimit të Organizuar (GJKKO) për kreun e Partisë së Lirisë, Ilir Meta, dhe ish-deputeten Monika Kryemadhi është shoqëruar me debate të forta mes dy ish-bashkëshortëve.
Përplasja nisi pasi Meta deklaroi në sallën e gjyqit se nuk kishte dijeni për veprimet e Kryemadhit, duke u distancuar edhe nga mesazhet dhe komunikimet që përmenden në dosjen hetimore.
Ish-presidenti mohoi të ketë pasur ndikim mbi Adrian Shatkun apo persona të tjerë, ndërsa hodhi poshtë pretendimet që lidhen me mesazhe të shkëmbyera me Monika Kryemadhin dhe Piro Xhixhon.
“Kjo është histori UDB-je dhe agjenturash greke. Nuk kam asnjë dijeni për veprimet e Monika Kryemadhit, i di vetë ajo. Ato historitë e mesazheve i di zonja Kryemadhi”, u shpreh Meta para trupit gjykues.
Deklaratat e tij sollën reagimin e menjëhershëm të Kryemadhit, e cila e akuzoi Metën se po mbështetet në thashetheme dhe informacione të pavërtetuara.
“Boll se nuk është ashtu. Me llafet që të sjell Altin Dumani, thashetheme flet këtu. Mos u merr me llafe grash. Akoma merresh me thashethemet e Tedi Blushit?”, iu drejtua ajo Metës.
Debati u përshkallëzua më tej kur Kryemadhi sulmoi verbalisht Tedi Blushin, i pranishëm në sallë, duke deklaruar se prej katër vitesh ka duruar sjelljen e tij.
“Kam katër vjet që e dëgjoj dhe e duroj. Edhe babai im të çohet nga varri, nuk e duroj dot më. Do t’i lexoj dhe unë mesazhet e tua. Me llafet e këtij rrogëtari merresh ti?”, tha Kryemadhi.
Për shkak të tensioneve, gjykata ndërhyri duke paralajmëruar palët për ruajtjen e rendit në sallë. Trupi gjykues i tërhoqi vëmendjen Kryemadhit se, në rast të përsëritjes së sjelljeve të tilla, mund të përjashtohet nga seanca dhe të ndëshkohet me gjobë.
“Do ju nxjerr nga salla e gjyqit. Paralajmërojmë të pandehurën Monika Kryemadhi, nëse e përsërisni, do largoheni nga seanca dhe do të gjobiteni”, deklaroi gjykata.m.k
