Policia e Vaut të Dejës ka finalizuar operacionin e koduar “Monitorimi”, në kuadër të goditjes së rasteve të kultivimit të bimëve narkotike, duke çuar në arrestimin e dy personave, mes tyre edhe një grua, të dyshuar si autorë të kultivimit të kanabisit.
Sipas njoftimit zyrtar, në pranga janë vënë shtetasit P.P., 33 vjeç dhe A.P., 43 vjeçe, vëlla e motër, banues në fshatin Kroni i Madh. Ata dyshohen se kishin kultivuar një numër të konsiderueshëm bimësh dhe fidanësh të dyshuar narkotikë Cannabis Sativa në territorin e këtij fshati.
Gjatë kontrolleve në terren, shërbimet e policisë konstatuan parcelën me bimë narkotike, të cilat u asgjësuan nëpërmjet djegies, me përjashtim të një pjese që u sekuestrua në cilësinë e provës materiale.
Në vijim të veprimeve hetimore, materialet iu referuan Prokurorisë edhe për kryeplakun e fshatit Kroni i Madh, D.D., 51 vjeç, si dhe për vrojtuesin e pyjeve, N.G., 56 vjeç. Të dy po procedohen në gjendje të lirë për veprën penale “Shpërdorimi i detyrës”, pasi dyshohet se nuk kanë ushtruar përgjegjësitë ligjore për evidentimin dhe raportimin e kultivimit të bimëve narkotike.
Policia bën me dije se kontrollet dhe monitorimet do të vijojnë në të gjithë territorin e qarkut Shkodër, me synim parandalimin dhe goditjen e rasteve të kultivimit të lëndëve narkotike.a.b
