Aktivisti Erlis Sina ka reaguar pas postimit të kryeministrit Edi Rama, i cili publikoi në Facebook fotografinë e tij të vetëm përballë Kryeministrisë, të shoqëruar me një mesazh ku e ftonte për dialog dhe mirëkuptim.
Në reagimin e tij publik, Sina kundërshtoi mesazhin e Ramës dhe refuzoi identifikimin me përshkrimin që kryeministri i bëri protestuesit, duke e akuzuar atë për përgjegjësi të drejtpërdrejtë në problemet me të cilat përballen qytetarët shqiptarë.
“Je autori i emigrimit të mijëra të rinjve që nuk panë më të ardhme në Shqipëri. Je autori i padrejtësive që i detyrojnë njerëzit të largohen nga vendi i tyre. Je autori i arrogancës së një pushteti që nuk dëgjon më askënd përveç vetes”, shkruan Sina.
Reagimi vjen pasi Rama publikoi një letër të gjatë të drejtuar protestuesit, ku theksonte se nuk e shihte atë si kundërshtar apo armik.
“Nuk të shoh si humbësin e një proteste, po si njeriun e mbetur vetëm me bindjet e tij”, shkroi kryeministri, duke shtuar se protestuesi mund të jetë i shqetësuar për çështje të ndryshme sociale, ekonomike apo mjedisore.
Në mesazhin e tij, Rama argumenton se protestuesit po përdoren nga aktorë politikë, mediatikë dhe grupe të interesit, ndërsa këmbëngul se problemet e qytetarëve nuk zgjidhen përmes zemërimit dhe përplasjes politike.
“Eja pra tek unë, qoftë edhe vetëm për të mos lënë askënd ta përdorë hallin tënd kundër Shqipërisë dhe as të përdorë hallet e Shqipërisë kundër teje”, shkruan Rama.
Kryeministri mbyll mesazhin me thirrjen për bashkëpunim, duke deklaruar se “Shqipëria nuk bëhet as me ata që brohorasin verbërisht, as me ata që zemërohen verbërisht”, si dhe duke theksuar se “Unë jam miku, jo armiku yt”.
ERLIS SINA/.Pergjigje e detyruar per Edi Ramen!
UNË NUK JAM TI!
Mos më thuaj se te fotografia ime sheh veten tënde.
Unë nuk jam ti.
Unë nuk jam ai që ka pushtetin prej vitesh në dorë.
Nuk jam ai që firmos vendime që ndryshojnë jetët e njerëzve.
Nuk jam ai që kontrollon institucionet, buxhetet dhe fatet e këtij vendi.
Ti je.
Prandaj mos guxo të më thuash se halli im është si halli yt.
Ti nuk je viktima e halleve të mia.
Ti je autori i tyre.
Je autori i emigrimit të mijëra të rinjve që nuk panë më të ardhme në Shqipëri.
Je autori i padrejtësive që i detyrojnë njerëzit të largohen nga vendi i tyre.
Je autori i arrogancës së një pushteti që nuk dëgjon më askënd përveç vetes.
Kur thua se ke frikë nga ata që mund t’i bëjnë keq Shqipërisë, harro një gjë:
Nuk ka humnerë më të thellë se vjedhja e votës.
Nuk ka humnerë më të thellë se grabitja e pronës.
Nuk ka humnerë më të thellë se shkatërrimi i dinjitetit.
Nuk ka humnerë më të thellë se vjedhja e së ardhmes së një brezi të tërë.
Mijëra njerëz nuk mbushin sheshet sepse i manipulon algoritmi.
Nuk protestojnë sepse ua kërkojnë influencerat.
Nuk zemërohen sepse ua dikton opozita.
Ata dalin në shesh sepse jetojnë realitetin çdo ditë.
Sepse paguajnë faturat.
Sepse kërkojnë punë.
Sepse presin në spitale.
Sepse shohin fëmijët të largohen.
Sepse ndihen të huaj në vendin e tyre.
Dhe kur ti përpiqesh t’i paraqesësh si turmë të përdorur, nuk po i kupton.
Po i përçmon.
Fotografia ime në murin tënd më bën pis.
Mos e përdor për të larë përgjegjësitë e tua.
Mos e përdor për të fshehur dështimet e tua.
Mos e përdor për të ndërtuar historinë tënde si shpëtimtar.
Unë nuk jam ti.
Dhe nëse jam në shesh, nuk jam aty sepse më ka mashtruar dikush.
Jam aty sepse e di shumë mirë kush më ka sjellë deri këtu.
