Pas 22 ditësh tubimesh dhe konsultimesh me qytetarët, Grupi Koordinues i Protestës ka dalë me një deklaratë politike, ku ka paraqitur pesë kërkesat kryesore të protestës qytetare.
Deklarata u lexua para protestuesve nga aktivisti Dritan Goxhaj, i cili tha se kërkesat janë rezultat i propozimeve të mbledhura nga qytetarët gjatë ditëve të protestës dhe përfaqësojnë vullnetin e tyre.
Në emër të Grupit Koordinues të Protestës, Goxhaj prezantoi kërkesat e mëposhtme:
1. Dorëheqjen e panegociueshme të Kryeministrit dhe të qeverisë.
2. Krijimin e një qeverie teknike tranzitore, jopartiake, me mandat 12-mujor.
3. Ndryshime Kushtetuese, ku të gjithë shtetasit shqiptarë të jenë të barabartë para ligjit, si dhe miratimin e saj me referendum popullor, duke përfshirë ndër të tjera:
• Ndryshimin e Kodit Zgjedhor;
• Ndryshimin e ligjit për financimin e partive politike dhe organizatave të ndryshme;
• Kufizimin e ushtrimit të detyrës së Kryeministrit në jo më shumë se dy mandate, të plota ose të pjesshme, gjatë gjithë jetës politike të një individi.
4. Paralelisht, kërkojmë:
• Anulimin e ndryshimeve të bëra në ligjin për “Zonat e Mbrojtura”;
• Anulimin e ndryshimeve të bëra në ligjin për “Trashëgiminë Kulturore”;
• Shfuqizimin e paketës ligjore të njohur si “Paketa e Maleve”;
• Shfuqizimin e statusit dhe të kuadrit ligjor për “Investimet Strategjike”.
5. Kontrata e re sociale mes qytetarëve dhe shtetit do të përpilohet pas konsultimit me intelektualë, ekspertë teknikë dhe qytetarë apartiakë, të propozuar nga sheshi i protestës.
Në përfundim të deklaratës, Grupi Koordinues theksoi se këto janë kërkesa të qarta, legjitime dhe të panegociueshme, të dala nga zëri i qytetarëve dhe nga vullneti i sovranit.
“Ne mbetemi të vendosur në rrugën e protestës paqësore, demokratike dhe qytetare deri në realizimin e tyre”, u shpreh Dritan Goxhaj para protestuesve.
Grupi Koordinues ka paralajmëruar vijimin e protestave edhe në ditët në vijim, duke këmbëngulur në përmbushjen e plotë të kërkesave të paraqitura.
