Një person i shpallur në kërkim ka shkaktuar një aksident me dëme materiale në Durrës, teksa tentonte t’i largohej policisë.
Sipas njoftimit paraprak, rreth orës 12:45, në lagjen nr. 14 të Durrësit, shërbimet e Forcës së Posaçme “Shqiponja” i kanë bërë shenjë ndalimi drejtuesit të një automjeti që po lëvizte me shpejtësi. Drejtuesi nuk iu bind urdhrit të policisë dhe vijoi lëvizjen.
Gjatë tentativës për t’u larguar, ai përplasi pesë automjete të parkuara, duke shkaktuar vetëm dëme materiale. Më pas, drejtuesi i mjetit, shtetasi R. Xh., braktisi automjetin dhe u largua me vrap nga vendi i ngjarjes.
Menjëherë pas incidentit, shërbimet e Policisë nisën ndjekjen dhe po kryejnë kontrolle intensive në zonë për lokalizimin dhe kapjen e tij.
Nga verifikimet e para ka rezultuar se R. Xh. ishte shpallur në kërkim për veprën penale “Largimi i të burgosurit nga vendi i qëndrimit”, pasi kishte thyer masën e sigurisë “Arrest në shtëpi”, të caktuar më herët për veprën penale “Mashtrimi”.
Grupi hetimor vijon veprimet për zbardhjen e plotë të rrethanave të ngjarjes dhe dokumentimin ligjor të saj.
