Partia Demokratike ka ngritur akuza ndaj Bashkisë së Himarës lidhur me një tender mbi 500 mijë euro për menaxhimin e pronave në disa fshatra të zonës, duke paralajmëruar rrezik për interesat e pronarëve vendas.
Në një deklaratë për mediat, zëdhënësja për Antikorrupsionin në PD, Genta Vangjeli, tha se nën drejtimin e kryebashkiakut Vangjel Tavo, Bashkia Himarë ka shpallur fituese kompaninë “EC PRO PARTNERS” shpk për një projekt që parashikon regjistrimin fillestar sistematik të pasurive dhe krijimin e bazës së të dhënave për 7308 prona në Himarë, Çorraj, Fterrë, Gjilekë, Kallarat dhe Pilur.
Sipas Vangjelit, kompania private do të ketë një rol kyç në procesin e evidentimit dhe regjistrimit të pronave në një nga zonat më të lakmuara të vendit, çka sipas saj ngre pikëpyetje mbi garantimin e të drejtave të pronarëve.
PD pretendon se kompania fituese ka pasur më herët bashkëpunime në projekte me vlera të mëdha me shoqërinë “Gjikuria” shpk, duke ngritur dyshime për favorizim të interesave private.
Demokratët theksojnë se vetë dokumentacioni i tenderit pranon ekzistencën e problemeve me regjistrimin e pronave dhe hartat kadastrale, ndërsa kërkojnë transparencë të plotë, verifikim të procesit dhe garanci ligjore që pronat e banorëve të Himarës nuk do të cenohen.
“Himara nuk është pronë e Vangjel Tavos dhe as e Edi Ramës. Pronat e himariotëve nuk mund të vendosen në shërbim të interesave private dhe klienteliste”, deklaroi Vangjeli.a.b
