Manifestimet antiqeveritare përpara Kryeministrisë kanë hyrë në ditën e 93-të, ndërsa nga sheshi është bërë thirrje për një mobilizim të gjerë kombëtar më 7 shtator, që përkon me ditën e 100-të të protestës.
Një prej aktivistëve iu drejtua qytetarëve me një fjalim me tone të ashpra, duke kërkuar pjesëmarrje masive nga të gjitha qytetet e vendit, ndërsa një ftesë e veçantë iu drejtua edhe shqiptarëve të diasporës.
Sipas tij, 7 shtatori duhet të shënojë një pikë kthese për lëvizjen protestuese, me synimin për largimin e kryeministrit Edi Rama dhe qeverisë së tij.
“Sot mbushim 93 ditë në shesh dhe nuk kemi ndërmend të bëjmë asnjë hap pas! Më 7 shtator është dita e 100-të e protestës sonë dhe do të ngrihet e gjithë Shqipëria në një protestë kombëtare”, u shpreh aktivisti.
Organizatorët kanë bërë thirrje për pjesëmarrje nga qytetarët në të gjitha qarqet, ndërsa kanë ftuar edhe emigrantët shqiptarë që të udhëtojnë drejt Tiranës për t’iu bashkuar protestës.
“Nuk është vetëm rrëzimi i Ramës”
Në fjalimin e tij, aktivisti deklaroi se objektivi i protestës nuk kufizohet vetëm te largimi i kryeministrit Edi Rama, por synon një ndryshim më të gjerë të sistemit politik.
Sipas tij, dorëheqja apo rrëzimi i qeverisë aktuale do të ishte vetëm pika e nisjes së një procesi transformues.
“Kjo nuk është një protestë vetëm për rrëzimin e Edi Ramës. Rrëzimi i Edi Ramës është fillimi i procesit që do të vijë më pas dhe rrëzimi i Ramës është hapi i parë”, deklaroi ai.
Aktivisti tha se protestuesit do të vijojnë qëndrimin në shesh edhe nëse pas një largimi të mundshëm të qeverisë do të shpalleshin zgjedhje të parakohshme.
Sipas tij, kërkesa është ndryshimi i rregullave të funksionimit të sistemit politik dhe jo vetëm zëvendësimi i një kryeministri me një tjetër.
“Në rast se Edi Rama bie dhe nxiton të thërrasë zgjedhje të jashtëzakonshme, ne do të jemi përsëri këtu. Sepse ne jemi për të ndërruar sistemin dhe jo thjesht emrin e kryeministrit”, u shpreh ai.
Protesta përpara Kryeministrisë vijon prej 93 ditësh, ndërsa organizatorët synojnë që 7 shtatori, dita e 100-të e manifestimeve, të shndërrohet në protestën më të madhe kombëtare të kësaj lëvizjeje.
