Ish-drejtori i Agjencisë Shtetërore të Kadastrës në Dibër, aktualisht zëvendësdrejtor i këtij institucioni, D. Gj., është shpallur në kërkim në kuadër të operacionit të koduar “Tjetërsimi”, që goditi një skemë të dyshuar të falsifikimit të dokumenteve dhe tjetërsimit të paligjshëm të pronave.
Për D. Gj. gjykata ka caktuar masën e sigurisë “Arrest në burg”, ndërsa në kërkim është shpallur edhe noterja A. M., për të cilën është caktuar masa “Arrest në shtëpi”.
Operacioni, i finalizuar pas një hetimi 7-mujor të Prokurorisë së Dibrës dhe Policisë, ka çuar në ekzekutimin e 14 masave të sigurisë ndaj punonjësve dhe ish-punonjësve të ASHK-së, si dhe ndaj personave që dyshohet se kanë përfituar prona nëpërmjet dokumenteve të falsifikuara.
Në masën “Arrest në shtëpi” janë lënë K. Xh., ish-specialist matjesh në terren në ASHK Dibër, dhe R. L., përgjegjës i Sektorit të Legalizimeve në këtë institucion.
Ndërsa masa “Detyrimi për t’u paraqitur në Policinë Gjyqësore” është caktuar për E. V., hartograf në ASHK Dibër; G. H., përgjegjëse e Sektorit të Legalizimeve dhe ish-juriste; V. Gj., juriste në Sektorin e Shërbimeve Kadastrale; Xh. H., hartografe në Sektorin e Legalizimeve; D. D. dhe F. P., hartografe në Sektorin e Shërbimeve Kadastrale.
Sipas hetimeve, zyrtarët e Kadastrës dhe noterja dyshohet se kanë bashkëpunuar në falsifikimin e dokumenteve dhe kryerjen e veprimeve të kundërligjshme administrative për tjetërsimin e pronave në favor të T. D. dhe familjarëve të tij. Hetimet vijojnë për identifikimin e personave të tjerë të përfshirë në këtë skemë.a.b
