Protesta qytetare kundër qeverisë ka hyrë në ditën e saj të 19-të radhazi në Tiranë. Mijëra qytetarë u mblodhën fillimisht në Sheshin “Skënderbej” dhe më pas marshuan drejt Kuvendit, ku pritën daljen e deputetëve duke artikuluar thirrje kundër tyre. Më pas protestuesit u zhvendosën përpara Kryeministrisë, ku vijuan tubimin.
Pjesëmarrësit kërkojnë dorëheqjen e kryeministrit Edi Rama dhe largimin e qeverisë, ndërsa kritikat e tyre janë drejtuar edhe ndaj opozitës. “Opozita jemi ne” mbetet një nga sloganet më të përsëritura të protestës, duke reflektuar pakënaqësinë ndaj klasës politike tradicionale dhe kërkesën për një alternativë të re qytetare.
Për shkak të temperaturave të larta, organizatorët kanë vendosur që protesta të nisë në orën 19:00, orar që është zbatuar edhe në ditët e fundit.
Gjatë tubimit para Kryeministrisë, aktivisti Edison Lika deklaroi se ish-zëvendëskryeministrja Belinda Balluku është thirrur sërish nga SPAK. “Rama në burg, Belinda në burg. Nuk i mjaftuan 300 apartamentet, i dolën edhe vilat në jug. Siç duket, nga vilat në jug dhe apartamentet në Tiranë, do të përfundojë me një dhomë në burgun e Pogradecit”, u shpreh ai.
Në protestë foli edhe një mjeke gjinekologe, e cila tha se kishte studiuar në Varshavë, por kishte zgjedhur të ushtrojë profesionin në Shqipëri. Ajo theksoi nevojën për më shumë transparencë dhe përfshirjen e profesionistëve në zhvillimin e vendit.
“Kam studiuar jashtë, por vendosa të kthehem dhe të punoj këtu. Shqipëria ka mjekë, ekonomistë, urbanistë dhe profesionistë të shkëlqyer. Na duhet një ‘brain gain’ dhe jo largimi i trurit. Ëndrra ime është që Shqipërinë ta ndërtojmë vetë”, deklaroi ajo.a.b
