Parlamenti Europian ka miratuar një amendament në kuadër të Raportit të Komisionit Europian për Shqipërinë për vitin 2025, ku shpreh shqetësim për situatën në zonat e mbrojtura dhe u kërkon autoriteteve shqiptare të ndërmarrin masa të menjëhershme për mbrojtjen e tyre.
Në amendamentin e votuar, eurodeputetët ngrenë shqetësimin se zhvillimet e vazhdueshme në zonën e mbrojtur Vjosa-Nartë tregojnë pasojat konkrete të ndryshimeve ligjore të bëra në ligjin për zonat e mbrojtura, si dhe rreziqet që ato paraqesin për territoret me vlera të rëndësishme ekologjike.
Parlamenti Europian bën të ditur se po ndjek nga afër protestat paqësore të zhvilluara kundër këtyre ndërhyrjeve dhe i kërkon qeverisë shqiptare të vendosë menjëherë një moratorium për të gjitha procedurat e reja të lejeve, punimet e ndërtimit dhe projektet zhvillimore brenda zonave të mbrojtura.
Sipas amendamentit, ky moratorium duhet të qëndrojë në fuqi deri në shfuqizimin e dispozitave të kundërshtuara të ligjit të ndryshuar për zonat e mbrojtura dhe deri në garantimin e përputhjes së plotë me standardet e Bashkimit Europian për mbrojtjen e natyrës, në përputhje me kërkesat e Kapitullit 27 të negociatave.
Gjithashtu, eurodeputetët theksojnë se çdo projekt që parashikohet të zhvillohet në këto zona duhet t’i nënshtrohet vlerësimeve të plota të ndikimit në mjedis, në përputhje me standardet europiane, duke garantuar një proces transparent konsultimi me komunitetet lokale.
