Pas rreth dy orësh i bllokuar në zyrë, pasi protestuesit kishin bllokuar hyrjet e Kryeministrisë, kryeministri Edi Rama është larguar nga godina nën masa të rrepta sigurie.
Largimi i kreut të qeverisë është bërë në momentin kur protestuesit kanë nisur marshimin në rrugët e Tiranës, duke krijuar mundësinë për kalimin e eskortës së kryeministrit.
Protestuesit ishin mbledhur përpara Kryeministrisë që prej orës 20:00, me flamuj kombëtarë, pankarta dhe simbolet e “Revolucionit Flamingo”. Gjatë mbrëmjes, ata kanë vijuar thirrjet kundër qeverisë.
“Këtu vendosim ne!”, “Rama ik!” dhe “Rama diktator!” ishin disa prej sloganeve të dëgjuara gjatë protestës.
Në terren janë angazhuar forca të shumta të Policisë së Shtetit dhe FNSH-së, të cilat kanë krijuar një kordon sigurie rreth godinës. Në disa momente situata është tensionuar, ndërsa efektivët kanë tentuar të largojnë protestuesit nga hyrjet e Kryeministrisë përmes dhunës. Një numër protestuesish u ndaluan.
Largimi i Ramës është shoqëruar me një prani të shtuar të forcave të sigurisë. Pamjet nga protesta tregojnë eskortën e kryeministrit duke u larguar nga zona, ndërsa efektivët kanë garantuar kalimin e saj.
Pas largimit të kryeministrit, protesta ka vijuar me marshimin e qytetarëve në rrugët e Tiranës.m.k
