Prokuroria e Posaçme kundër Korrupsionit dhe Krimit të Organizuar ka vendosur nën sekuestro hotelin luksoz me pesë yje “Zig Zag” në Jalë, në kuadër të operacionit kundër një rrjeti të dyshuar të trafikut ndërkombëtar të kokainës dhe pastrimit të parave.
Hoteli është pjesë e 491 pasurive të sekuestruara nga SPAK, me një vlerë të përgjithshme të përllogaritur rreth 150 milionë euro. Në listën e pasurive të bllokuara përfshihen hotele, vila, apartamente, troje, llogari bankare dhe aksione kompanish në disa prej zonave më të rëndësishme të vendit.
Mes pasurive të sekuestruara ndodhet edhe një truall me vlerë të lartë ekonomike pranë stadiumit “Air Albania” në Tiranë, i lidhur me një procedurë shpronësimi për projektin e njohur si “Shkolla e Biçikletave”. Sipas hetimeve, kjo pronë është pjesë e verifikimeve të SPAK për përfitime të dyshuara nga persona të lidhur me grupin kriminal.
Po ashtu, nën sekuestro janë vendosur edhe 121 vila, apartamente, duplekse dhe poste parkimi në kompleksin turistik “Lalzi Marina Seaside” në Gjirin e Lalzit, si dhe pasuri të tjera në Dhërmi, Himarë, Durrës, Tiranë, Sarandë, Shkodër dhe Elbasan.
Sipas SPAK, grupi i dyshuar kriminal drejtohej nga Dritan Gjika dhe Denis Matoshi alias Eldi Dizdari, ndërsa në qendër të skemës së dyshuar të pastrimit të parave qëndronte Isa Aliu. Hetuesit dyshojnë se të ardhurat e siguruara nga trafiku ndërkombëtar i kokainës janë investuar në sektorët e ndërtimit, turizmit dhe pasurive të paluajtshme.
Operacioni është shoqëruar edhe me kontrolle në 23 ambiente, përfshirë kompani ndërtimi, zyra biznesi dhe banesa private. SPAK thekson se hetimet vijojnë për dokumentimin e plotë të skemës së dyshuar kriminale dhe gjurmimin e të gjitha aseteve që dyshohet se janë krijuar me të ardhura të paligjshme.
Personat e përmendur prezumohen të pafajshëm derisa fajësia e tyre të provohet me vendim të formës së prerë.
