Ermal Pashaj, mjeku që u bë viral me fjalimin e tij gjatë protestave kundër qeverisë së Edi Ramës, ka shpjeguar arsyet që e kanë shtyrë t’i bashkohet revoltës qytetare. Ai deklaroi se ndihet i pambrojtur nga shteti dhe se problematikat e përditshme po e bëjnë gjithnjë e më të vështirë jetën e qytetarëve.
Në një intervistë për News24, Pashaj tha se përballet me shqetësime që lidhen me ndërtimet, sigurinë ushqimore dhe urbanizimin, duke ngritur edhe pikëpyetje për ndikimin e mjedisit në shëndetin e njerëzve.
“Për shkak të profesionit kemi akuzuar shpeshherë situatat që cenojnë ushqimin, por po shohim realitete të tjera. Shikojmë pacientë me patologji onkologjike që nuk janë përdorues të duhanit, nuk janë alkoolistë dhe nuk kanë faktorët klasikë të riskut. Këto fenomene na bëjnë të dyshojmë te siguria ushqimore, te dendësia dhe urbanizimi i paskrupullt”, tha ai.
Mjeku tregoi edhe një problem personal me një investim për banesë, ku sipas tij apartamenti që kishte blerë i ishte shitur paralelisht edhe një personi tjetër.
“Kam bërë një kontratë dhe këtë apartament nuk e gëzova dot kurrë, sepse i ishte shitur dikujt tjetër paralelisht”, u shpreh Pashaj.
Në fund ai deklaroi se ndihet i cenuar dhe kërkon që qytetarët të kenë më shumë mbrojtje nga institucionet.
“Ndihem i dhunuar nga shteti dhe i pambrojtur nga streha shoqërore. Ulëras sepse ndihem qytetar i lirë dhe jap detyrimet e mia ndaj shtetit”, deklaroi mjeku.a.b
