Ditën e 17-të të protestës qytetare para Kryeministrisë janë njoftuar disa ndryshime në organizimin e tubimeve, ku më kryesori lidhet me ndryshimin e orarit për shkak të temperaturave të larta. Organizatorët bënë të ditur se duke nisur nga dita e nesërme protesta do të zhvillohet në orën 19:00.
Një tjetër risi e paralajmëruar është se fjalimet gjatë protestave do të mbahen kryesisht nga të rinjtë, të cilët do të përcjellin mesazhet e tyre ndaj qeverisë dhe klasës politike.
Njëri prej organizatorëve, Arben Kola, deklaroi se qëllimi i protestës mbetet i pandryshuar, duke theksuar se synimi është largimi i qeverisë dhe i asaj që ai e quajti kastë politike.
“Qëllimi është rrëzimi i qeverisë dhe kastës politike. Protesta është unike dhe është kthyer në frymëzim. Ne do të nisemi, ndërsa gratë dhe fëmijët do të kenë pozicionin e parë”, u shpreh ai.
Nga protesta foli edhe një vajzë e re, e cila i kërkoi kryeministrit Edi Rama të tërhiqet nga projektet e kundërshtuara dhe të largohet nga pushteti.
“Ai tha se projekti është në interes të publikut. Por kur ka qenë? Kurrë! Anulo projektet dhe zhduku nga Shqipëria”, deklaroi ajo.
Një tjetër protestues iu përgjigj deklaratave të kryeministrit se protestat po dëmtojnë turizmin, duke ngritur shqetësimin për familjet shqiptare që, sipas tij, nuk kanë mundësi të kalojnë pushime në bregdet.
“Kryeministri tha se kjo protestë po dëmton turizmin. A e di zoti kryeministër se ka familje shqiptare që nuk kanë qenë kurrë në bregdet me pushime? Ne po na mbështet e gjithë bota sepse guxuam të ngremë zërin kundër këtyre këtu”, tha ai. a.b
