Vetëm një javë pasi u shpall fitues i çmimit “Libri më i mirë për fëmijë” në Panairin e Librit Shqip “Shkupi 2026”, libri “Sekreti i fshehur në libra” i shkrimtares Rovena Rrozhani po hyn në ribotim, duke konfirmuar interesin e madh të lexuesve të vegjël dhe vlerësimin e kritikës.
Botuar për herë të parë në nëntor të vitit 2025, libri u prit me entuziazëm nga fëmijët dhe prindërit, ndërsa tashmë po rikthehet në treg pas suksesit të tij në Shqipëri dhe rajon.
Lajmin e ribotimit e bëri të ditur vetë autorja në rrjetet sociale, ku falënderoi lexuesit që e përfshinë librin në bibliotekat e tyre familjare. “Lexuesit janë frymëzimi për libra të rinj”, shkroi ajo.
“Sekreti i fshehur në libra” është një përmbledhje rrëfenjash dhe poezie që trajton tema të rëndësishme për botën e fëmijëve, si dashuria për librin, miqësia, mbrojtja e mjedisit, njohja e emocioneve, vetëbesimi dhe fuqia e ëndrrave.
Në Panairin e Librit Shqip në Shkup, juria e kryesuar nga studiuesi Ali Aliu e vlerësoi veprën si botimin më të mirë për fëmijë të vitit 2025 mes botimeve nga Shqipëria, Kosova dhe Maqedonia e Veriut. Në motivacion u theksua “pranëvënia e lojës me dijen dhe e prozës me poezinë, si një pasqyrë ku fëmijët zbulojnë botën dhe veten”.
Libri ka marrë vlerësime të shumta edhe nga studiues dhe specialistë të letërsisë për fëmijë. Shkrimtari dhe studiuesi Xhahid Bushati e cilëson veprën si një ftesë për të zbuluar “sekretin” që fshihet në çdo libër, duke vënë në dukje ndërthurjen e fantazisë me realitetin e fëmijërisë, si dhe gjuhën artistike që nxit imagjinatën dhe mendimin krijues.
Nga ana e saj, psikologia Blerta Bodinaku vëren se libri ndihmon fëmijët të njohin, emërtojnë dhe përpunojnë emocionet e tyre, duke e cilësuar atë si “një urë dashurie mes botës së të rriturve dhe asaj të fëmijëve”.
Edhe studiuesja Albana Deda e konsideron Rovena Rrozhanin një zë tashmë të afirmuar në letërsinë shqipe për fëmijë, duke vlerësuar kontributin e saj në pasurimin e këtij zhanri.
Me këtë sukses të ri, Rovena Rrozhani konfirmohet si një prej autoreve më të spikatura të brezit të saj në letërsinë për fëmijë, duke vijuar traditën e krijimtarisë shqiptare që edukon, frymëzon dhe ushqen dashurinë për librin që në moshë të hershme.r.k
