Deputetja e Shkodrës, Marjana Koçeku, e njohur edhe si “Neomalësorja”, ka reaguar sërish në rrjetet sociale pas vendimit për t’u larguar nga grupi parlamentar i Partisë Socialiste dhe për të vijuar mandatin si deputete e pavarur.
Në një postim me tone sfiduese, Koçeku iu drejtua mazhorancës dhe kryeministrit Edi Rama, duke kërkuar zgjedhje të parakohshme nëse, sipas saj, qeveria është e bindur për mbështetjen që gëzon në Kuvend.
“Nuk ua kam marrë mandatin e deputetit. Ma keni marrë ju mue, për 10 muej rresht. Tash mandati ka ardhë në vend të vet. Nëse jeni kaq të sigurt që unë nuk fitoj pa ju dhe ju i keni plot 83 mandate, atëherë shpërndajeni parlamentin, shkojmë në zgjedhje të parakohshme dhe masim forcat se kush fiton çka. Kësaj radhe do marr me vete kecin tim të shtrenjtë, bashkë me kmesën e mprehtë, dhe do zbres me kandidue në Tiranë. Para se të vij, ndoshta iu marr leje malësorëve të mi me e folë gjuhën standarde”, shkruan Koçeku.
Një ditë më parë, deputetja publikoi edhe një mesazh ku shprehej: “Zot, më jep forcë, besim të drejtë e shpresë të sigurt. Mos na e kurse si popull frymën e urtisë dhe të kuptimësisë, që kurrë të mos largohemi drejt rrugëve t’humbura.”
Largimi i Koçekut nga grupi socialist ka nxitur reagime dhe diskutime në skenën politike. Burime pranë socialistëve në Shkodër janë shprehur se qëndrimet e saj të fundit nuk kanë qenë të papritura, duke kujtuar raste të mëparshme kur deputetja kishte shfaqur rezerva ndaj vendimeve të grupit parlamentar. a.b
