Një përplasje është regjistruar në ambientet e Gjykatës së Posaçme kundër Korrupsionit dhe Krimit të Organizuar (GJKKO), gjatë seancës ndaj të pandehurve të akuzuar për rrëmbimin dhe vrasjen e Renis Dobrës.
Sipas informacioneve paraprake, në incident janë përfshirë Fatjon Bushgjokaj, Aleksandër Bushgjokaj, Kristi Bushgjokaj dhe Petrit Hoxha, i njohur ndryshe si Çakraj. Debati mes tyre ka nisur brenda kafazit të xhamit ku qëndronin të pandehurit dhe më pas është përshkallëzuar në përleshje fizike.
Për të neutralizuar situatën kanë ndërhyrë menjëherë punonjësit e sigurisë së gjykatës, duke ndarë personat e përfshirë në konflikt. Ndërkohë, pranë godinës së GJKKO-së kanë mbërritur forca të shumta policie për të garantuar rendin dhe sigurinë.
Rrethanat që çuan në përplasjen mes të pandehurve nuk janë bërë ende të ditura, ndërsa pritet që autoritetet të japin më shumë detaje lidhur me ngjarjen.
