Valter Lleshi, rreth 45 vjeç, është gjetur i vrarë me armë zjarri mëngjesin e kësaj të hëne në Mirditë. Ngjarja ka ndodhur në fshatin Shkorret, në aksin rrugor Reps–Spaç, ku viktima është gjetur pa shenja jete brenda automjetit të tij.
Sipas informacionit paraprak të Policisë, dyshohet se Lleshi është ekzekutuar me armë zjarri. Menjëherë pas njoftimit, forca të shumta policie kanë mbërritur në vendngjarje dhe kanë nisur kontrolle intensive për identifikimin dhe kapjen e autorit ose autorëve.
Vrasja vjen vetëm pak muaj pasi Lleshi i kishte shpëtuar një atentati tjetër. Në muajin mars të këtij viti, ndaj tij u organizua një sulm me lëndë plasëse, por ai arriti të shpëtonte pa pësuar lëndime fatale.
Ndërkohë, një grup i posaçëm hetimor, nën drejtimin e Prokurorisë, po punon për administrimin e provave dhe zbardhjen e plotë të rrethanave të krimit, ndërsa motivet e ngjarjes mbeten ende të paqarta.a.b
