Presidenti i SHBA-së, Donald Trump, njoftoi të premten mbrëma se ushtria amerikane ka eliminuar Héctor Rusthenford Guerrero Flores, i njohur si “Niño Guerrero”, i konsideruar si kreu i organizatës kriminale Tren de Aragua.
Përmes një mesazhi në platformën e tij Truth Social, Trump bëri të ditur se Komanda Jugore e SHBA-së kreu një operacion që ai e cilësoi si “të shpejtë dhe vdekjeprurës”, duke çuar në vrasjen e liderit të grupit kriminal.
Sipas presidentit amerikan, operacioni u zhvillua në koordinim me autoritetet venezueliane, megjithëse nuk u dhanë detaje mbi vendndodhjen apo kohën e saktë të aksionit. Në postimin e tij u publikua edhe një video ku shfaqet goditja e një ndërtese nga një predhë dhe shpërthimi i saj në flakë.
Edhe Sekretari amerikan i Mbrojtjes, Pete Hegseth, konfirmoi operacionin, duke deklaruar se aksioni ishte realizuar gjatë kësaj jave. Ai e cilësoi atë si një dëshmi të bashkëpunimit mes SHBA-së dhe Venezuelës në luftën kundër organizatave kriminale dhe trafikantëve të drogës.
Megjithatë, deri tani, Shtëpia e Bardhë, Pentagoni dhe Komanda Jugore nuk kanë publikuar informacione shtesë mbi operacionin.
Departamenti Amerikan i Shtetit kishte vendosur më herët një shpërblim prej deri në 5 milionë dollarësh për informacione që do të çonin në kapjen e Guerrero Flores. Në fund të vitit të kaluar, ai u akuzua nga një gjykatë federale në Nju Jork për zhvatje, trafik droge dhe mbështetje të aktiviteteve terroriste.
Sipas autoriteteve amerikane, “Niño Guerrero” drejtoi për më shumë se një dekadë organizatën Tren de Aragua, duke e shndërruar atë nga një bandë e krijuar brenda një burgu venezuelian në një rrjet kriminal ndërkombëtar me aktivitet në disa vende të Amerikës Latine, Amerikës së Veriut dhe Evropës.
Autoritetet i atribuojnë grupit një sërë aktivitetesh kriminale, përfshirë trafik droge, rrëmbime, zhvatje, trafikim njerëzish, trafik emigrantësh, pastrim parash dhe veprimtari të tjera të paligjshme. Shtetet e Bashkuara e kanë shpallur Tren de Aragua organizatë terroriste.
Guerrero Flores, 43 vjeç, ishte një nga personat më të kërkuar nga autoritetet amerikane dhe konsiderohej figura kryesore e organizatës kriminale që operonte në vende si Kolumbia, Peruja, Kili, Ekuadori, Brazili dhe Panamaja.r.b
