Kryetari i Partisë Demokratike, Sali Berisha, deklaroi se nuk ka ndërmend të marrë pjesë fizikisht në protestën qytetare që po zhvillohet në Tiranë, duke argumentuar se prania e tij do të cenonte natyrën qytetare të saj.
I pyetur nga gazetarja Antonia Ponde se kur do t’i bashkohej protestuesve në shesh, Berisha u shpreh se e mbështet protestën në çdo moment, por se ka zgjedhur të mos jetë i pranishëm fizikisht.
“Çdo minutë unë jam në shesh dhe në mbështetjen më të madhe që mund t’i jap asaj proteste. Por fizikisht nuk jam aty dhe nuk është vendi im aty fizikisht, sepse ajo është një protestë qytetare”, tha ai.
Berisha bëri të ditur se ka udhëzuar të gjithë anëtarët dhe drejtuesit e Partisë Demokratike që të marrin pjesë në protestë vetëm si qytetarë dhe jo si përfaqësues politikë.
“Kam porositur prerazi të gjithë anëtarët dhe drejtuesit e Partisë Demokratike që në atë shesh do të jenë vetëm si qytetarë”, u shpreh kreu demokrat.
Sipas tij, prania e figurave politike mund t’i japë protestës “nuanca të panevojshme” dhe të zbehë forcën e saj qytetare. Ai vlerësoi mobilizimin e protestuesve, duke theksuar se protesta ka arritur një “madhështi” që duhet respektuar.
“Prania ime aty dëmton fibrën më të fuqishme të protestës, fibrën qytetare. Ajo ka arritur shumë dhe mua më mbetet ta respektoj atë”, deklaroi Berisha.
Në përfundim, lideri i opozitës ritheksoi se do të vazhdojë ta mbështesë protestën me të gjitha mundësitë e tij, ndërsa shprehu bindjen se ajo duhet të ruajë karakterin e saj qytetar për të arritur objektivat që ka vendosur.
