Të rinjtë e Partia Demokratike e Shqipërisë kanë bërë thirrje për pjesëmarrje masive në protestat që po zhvillohen përpara Kryeministrisë, duke kërkuar dorëheqjen e kryeministrit Edi Rama dhe të qeverisë së tij.
Në një deklaratë për mediat, përfaqësues të forumit rinor demokrat theksuan se protesta, e cila ka hyrë në ditën e saj të 11-të, duhet të mbështetet nga të gjithë qytetarët, pavarësisht bindjeve politike.
Përfaqësuesi i të rinjve demokratë, Nikola Kedhi, deklaroi se Shqipëria ndodhet në një situatë të vështirë dhe se problemet që prekin arsimin, shëndetësinë, ekonominë dhe sigurinë janë shqetësime që bashkojnë qytetarët përtej ndasive politike.
“Sot nuk është koha për dallimet mes njëri-tjetrit. Ajo që na bashkon është më e madhe sesa ajo që na ndan. Kemi një thirrje për çdo qytetar shqiptar, për çdo demokrat dhe veçanërisht për çdo të ri, që të jetë në shesh sot dhe çdo ditë për të ngritur zërin dhe për ta kthyer Shqipërinë në shtëpinë tonë sërish”, u shpreh ai.
Ndërkohë, Andia Ulliri u bëri thirrje qytetarëve që të marrin pjesë në protestë në emër të familjes, kombit dhe të ardhmes së të rinjve shqiptarë.
“Le të dalim në shesh me vendosmëri dhe dashuri për familjen, kombin dhe të rinjtë shqiptarë që largohen dita-ditës. Për të gjitha kauzat që na bashkojnë dhe jo për ato që na ndajnë”, deklaroi ajo.
Të rinjtë demokratë kanë paralajmëruar se do të jenë të pranishëm çdo ditë në protestat para Kryeministrisë, duke e cilësuar lëvizjen si një reagim qytetar ndaj situatës politike dhe sociale në vend.
