Kreu i Partia Demokratike e Shqipërisë, Sali Berisha, u ka bërë thirrje demokratëve dhe mbështetësve të opozitës që t’i bashkohen protestës qytetare që po zhvillohet në Tiranë, duke e cilësuar atë si një lëvizje me karakter rinor dhe qytetar.
Gjatë një deklarate në grupin parlamentar të PD, Berisha tha se kërkesa për largimin e kryeministrit Edi Rama është plotësisht legjitime dhe se opozita duhet ta mbështesë protestën pa simbole partiake.
“Çdo demokrat e demokrate, çdo mbështetës dhe mbështetëse e jona duhet ta mbështesë me të gjitha mënyrat këtë protestë. Kësaj here pa simbolet e partisë. Le të jenë rinia dhe qytetarët në qendër, sepse është një protestë qytetare dhe rinore”, deklaroi Berisha.
Berisha dënoi gjithashtu etiketimet që, sipas tij, u janë bërë protestuesve nga kryeministri Rama, duke kundërshtuar krahasimet me ideologjitë ekstremiste. Ai iu referua edhe figurës së Mit’hat Frashëri, duke e cilësuar atë si një patriot dhe mendimtar që nuk mund të identifikohet me ideologji ksenofobe.
Sipas Berishës, protesta përfaqëson një revoltë qytetare kundër qeverisjes aktuale dhe ka në qendër të saj mbrojtjen e interesit publik, mjedisit dhe trashëgimisë kulturore.
“Trungu i kësaj lëvizjeje madhështore është rinor dhe qytetar. Asnjëherë nuk duhet që gjethet të na pengojnë të shohim madhështinë e trungut”, u shpreh ai. a.b
