Policia e Shtetit ka ndërmarrë masa disiplinore ndaj disa drejtuesve të policisë në Shkodër, pas zbulimit të mijëra bimëve të dyshuara narkotike në zonën e Velipojës.
Sipas njoftimit zyrtar, gjatë kontrolleve në fshatin Reç i Ri, në Njësinë Administrative Velipojë, u evidentuan të kultivuara 7,446 bimë të dyshuara narkotike të llojit Cannabis Sativa.
Në vijim të verifikimeve, Drejtori i Përgjithshëm i Policisë së Shtetit, Skënder Hita, ka urdhëruar pezullimin nga detyra të tre efektivëve me funksione drejtuese: Shefit të Komisariatit të Policisë Shkodër, kryekomisar Bekim Lika, Shefit të Stacionit të Policisë Velipojë, nënkomisar Zef Marku, si dhe inspektorit Samet Kadroji, ndihmës/specialist për zonën ku u konstatuan bimët narkotike.
Ndërkohë, është nisur hetim disiplinor edhe ndaj dy punonjësve të tjerë të policisë, pjesë e strukturave të kontrollit të territorit, të cilët do të vijojnë detyrën deri në përfundim të procedurave të verifikimit.
Policia bëri të ditur se masat janë marrë në kuadër të përgjegjësive për parandalimin dhe goditjen e kultivimit të bimëve narkotike në territor.
