Teksa në Tiranë vijojnë protestat kundër qeverisë dhe kërkesat për dorëheqjen e tij, kryeministri Edi Rama ka reaguar nga Fieri, ku ishte i pranishëm në një aktivitet së bashku me zëvendëskryeministren Belinda Balluku.
Duke komentuar protestat që lidhen me projektet në Sazan dhe Zvërnec, Rama tha se kundërshtimet ndaj qeverisë nuk mund të ngatërrohen me shqetësimet mjedisore, duke argumentuar se debatet për biodiversitetin dhe mbrojtjen e natyrës duhet të zhvillohen përmes transparencës dhe dialogut me ekspertët.
Sipas kryeministrit, qytetarët kanë të drejtë të kërkojnë llogari për çdo projekt që prek mjedisin, por kjo duhet të bëhet mbi bazën e fakteve dhe jo përmes kërkesave për largimin e qeverisë.
“Nëse shqetësimi është për Sazanin, Zvërnecin, biodiversitetin apo flamingot, atëherë duhet të ketë dialog me ekspertët dhe transparencë të plotë për atë që po planifikohet. Nuk mund të kërkosh largimin e qeverisë kur pretendon se po proteston për mbrojtjen e mjedisit”, u shpreh Rama.
Kreu i qeverisë akuzoi organizatorët e protestave për manipulim të opinionit publik dhe tha se po përdoren argumente që, sipas tij, nuk qëndrojnë mbi fakte. Ai solli si shembull shpalljen e Vjosës Park Kombëtar, duke theksuar se qeveria ka ndërmarrë hapa konkretë në mbrojtje të natyrës.
Rama shtoi se kundërshtarët e projektit po përpiqen ta kthejnë debatin mjedisor në një përplasje politike me synim destabilizimin e qeverisë, por nënvizoi se, sipas tij, një qasje e tillë nuk do të ketë sukses.
“Llogaria kërkohet me transparencë dhe argumente. Të përdorësh një kauzë mjedisore për të kërkuar rrëzimin e qeverisë është një tjetër gjë. Me Partinë Socialiste dhe me mua kjo mënyrë nuk funksionon”, deklaroi kryeministri.m.k
