Kryeministri Edi Rama mbrojti vizionin e qeverisë për zhvillimin e turizmit elitar në Shqipëri, duke argumentuar se vendi duhet të kalojë gradualisht nga modeli i turizmit masiv drejt atij luksoz, me synimin për të rritur të ardhurat dhe për të ulur presionin mbi mjedisin.
Gjatë një bashkëbisedimi me gazetarë nga vendet e Bashkimit Europian, Rama tha se turizmi luksoz nuk është në kundërshtim me interesat e qytetarëve, por përkundrazi sjell më shumë përfitime ekonomike me një ndikim më të kufizuar në territor dhe infrastrukturë.
Sipas tij, turizmi masiv ka luajtur një rol të rëndësishëm në promovimin e Shqipërisë si destinacion ndërkombëtar, por modeli aktual nuk mund të vazhdojë pafundësisht. Kryeministri theksoi se zhvillimi i resorteve elitare është një mënyrë për të mbrojtur natyrën dhe për të garantuar një zhvillim më të qëndrueshëm të sektorit.
Rama hodhi poshtë akuzat se ndryshimet në ligjin për zonat e mbrojtura janë bërë për t’i hapur rrugë projekteve që dëmtojnë mjedisin. Ai mohoi gjithashtu pretendimet se investimet e planifikuara në Sazan dhe Zvërnec përbëjnë një proces privatizimi të pasurive publike, duke theksuar se bëhet fjalë për projekte të ndryshme dhe se rasti i Zvërnecit lidhet me prona private.
Kreu i qeverisë njoftoi se ligji për investimet strategjike nuk do të ekzistojë më në formën aktuale, ndërsa siguroi se Shqipëria do të respektojë standardet dhe kushtet e kërkuara në procesin e integrimit europian.
Duke iu referuar debatit për projektin e planifikuar në Zvërnec, Rama argumentoi se në shumë vende të botës zhvillimi ekonomik dhe mbrojtja e natyrës bashkëjetojnë me sukses. Ai shtoi se polemikat rreth investimit janë fryrë për shkak të lidhjes së projektit me emra të njohur ndërkombëtarë.
Sa i përket ishullit të Sazanit, kryeministri bëri të ditur se negociatat me investitorët vijojnë prej rreth dy vitesh, por përjashtoi mundësinë e shitjes së ishullit, duke theksuar se synimi i qeverisë mbetet tërheqja e kapitaleve të mëdha pa cenuar mjedisin.
Rama komentoi edhe protestat kundër projektit në Zvërnec, duke i cilësuar ato si pjesë e një fushate dezinformimi. Ai deklaroi se Shqipëria është prej tre vitesh objekt i sulmeve kibernetike nga Irani dhe pretendoi se ka përpjekje për të ndikuar në debatin publik përmes narrativave dhe informacioneve të rreme.
Sipas kryeministrit, investimi parashikohet të realizohet nga një kompani e madhe nga Lindja e Mesme, ndërsa projekti do t’i nënshtrohet vlerësimit mjedisor përpara se të marrë formën përfundimtare. Rama u shpreh se qeveria nuk do të lejojë që projekti të bllokohet përpara se të shqyrtohet në tërësi, duke e cilësuar kundërshtimin aktual si një përpjekje për ta penguar atë që në fazën fillestare.
