Mijëra qytetarë, mes tyre një numër i madh të rinjsh, kanë vijuar marshimin në rrugët e Tiranës edhe gjatë orëve të mbrëmjes, në kuadër të protestës që nisi pasditen e së dielës.
Me flamuj kombëtarë dhe pankarta në duar, protestuesit kanë përshkuar akset kryesore të kryeqytetit, duke shprehur pakënaqësinë e tyre ndaj qeverisë dhe duke kërkuar dorëheqjen e kryeministrit Edi Rama.
Gjatë marshimit janë dëgjuar vazhdimisht thirrje kundër kreut të qeverisë, ndërsa pjesëmarrësit kanë deklaruar se protestat do të vazhdojnë edhe në ditët në vijim.
Atmosfera është karakterizuar nga pjesëmarrje e lartë dhe slogane të shumta, teksa protestuesit kanë theksuar se kërkesa e tyre kryesore mbetet largimi i kryeministrit dhe ndryshimi i kursit politik të vendit.
Tubimi dhe marshimi në rrugët e kryeqytetit kanë vijuar pa incidente, ndërsa organizatorët kanë paralajmëruar vazhdimin e mobilizimit qytetar edhe në ditët e ardhshme.
