Futbolli shqiptar dhe ai kosovar janë në zi pas ndarjes së parakohshme nga jeta të futbollistit të ri Fation Fatmir Bunjaku.
22-vjeçari humbi jetën si pasojë e një aksidenti tragjik, duke lënë pas dhimbje të madhe te familjarët, miqtë dhe komuniteti sportiv. Lajmi i hidhur u bë publik përmes një njoftimi të shpërndarë nga faqja zyrtare e fshatit Samadraxhë.
“Njoftojmë me pikëllim se mbrëmë në një aksident tragjik ka ndërruar jetë Fation Fatmir Bunjaku. Për ditën dhe orën e varrimit do t’ju njoftojmë me kohë”, thuhet në njoftim.
Bunjaku konsiderohej një nga talentet premtuese të futbollit kosovar. Gjatë karrierës së tij ai ishte pjesë e disa klubeve në Kosovë, ndërsa së fundmi aktivizohej me ekipin e Elbasanit.
Futbollisti kishte veshur gjithashtu fanellën e përfaqësueses së Kosovës U-21, duke lënë gjurmë si një lojtar me perspektivë për të ardhmen.
Ndarja e tij e parakohshme ka tronditur botën e futbollit në Kosovë dhe Shqipëri, ndërsa mesazhet e ngushëllimit për familjen e tij kanë nisur të vijnë nga sportdashës, klube dhe figura të futbollit.r.s
