Mijëra qytetarë u mblodhën këtë të diel në Tiranë në një protestë masive kundër qeverisë, duke marshuar nga sheshi “Skënderbej” drejt godinës së Kryeministrisë.
Protestuesit mbushën rrugët kryesore të kryeqytetit me thirrje si “Shqipëri e re”, “Jep dorëheqje” dhe “Edi Rama, o tradhtar”, ndërsa kërkuan largimin e kryeministrit Edi Rama dhe mbajtjen e përgjegjësive politike për situatën në vend.
Kjo është dita e tetë radhazi e protestave para Kryeministrisë, ku qytetarët kanë përsëritur të njëjtën kërkesë, të cilën e cilësojnë të panegociueshme: dorëheqjen e kreut të qeverisë. Sipas organizatorëve dhe pjesëmarrësve, mobilizimi do të vijojë deri në realizimin e këtij objektivi.
Projekti i diskutueshëm i Zvërnecit është konsideruar nga protestuesit si shkaku që nxiti reagimin qytetar dhe protestat e vazhdueshme kundër qeverisë.
Tubimi u zhvillua pa incidente, ndërsa mes pjesëmarrësve ishte edhe analisti dhe publicisti Fatos Lubonja. Në fjalën e tij, ai tha se protesta ka bashkuar qytetarë me bindje të ndryshme politike, të cilët sipas tij kundërshtojnë atë që e cilësoi si kapje të vendit nga krimi dhe oligarkët.
Duke iu referuar sloganit “Shqipëria nuk është në shitje”, Lubonja deklaroi se protestuesit kundërshtojnë një model zhvillimi që, sipas tij, favorizon interesat e një grupi të vogël njerëzish në dëm të interesit publik.
Ai theksoi gjithashtu se protestat do të vazhdojnë edhe në ditët në vijim, ndërsa bëri thirrje për hetimin e projektit të Zvërnecit dhe për reagimin e institucioneve ligjzbatuese ndaj pretendimeve të ngritura nga qytetarët.a.b
