Komisioni Qendror i Zgjedhjeve ka bërë të ditur se procesi i votimit për zgjedhjet e parakohshme parlamentare në Kosovë po zhvillohet normalisht në të gjithë vendin.
Sipas të dhënave të publikuara nga KQZ, deri në orën 11:00 të ditës së sotme kanë ushtruar të drejtën e votës më shumë se 110 mijë qytetarë, ose rreth 5.5% e numrit të përgjithshëm të votuesve të regjistruar.
Autoritetet zgjedhore njoftojnë se materiali zgjedhor, përfshirë fletëvotimet, është shpërndarë në kohë në të gjitha qendrat e votimit, duke mundësuar nisjen pa probleme të procesit zgjedhor.
Votimi po zhvillohet në 949 qendra votimi me gjithsej 2,550 vendvotime. Prej tyre, 911 qendra me 2,498 vendvotime janë të dedikuara për votimin e rregullt, ndërsa 38 qendra, nga një në secilën komunë, me 52 vendvotime shërbejnë për votimin me kusht.
Në Listën e Votuesve figurojnë 1,959,962 qytetarë me të drejtë vote, të shpërndarë në 38 komunat e Kosovës.
KQZ u ka bërë thirrje qytetarëve që të marrin pjesë në procesin zgjedhor dhe të ushtrojnë të drejtën e tyre kushtetuese për të votuar.
Në garë për këto zgjedhje janë certifikuar 21 subjekte politike, përfshirë 17 parti, 3 koalicione dhe 1 kandidat të pavarur. Në total konkurrojnë 902 kandidatë, nga të cilët 593 janë burra dhe 309 gra.
Qytetarët mund të verifikojnë qendrën e tyre të votimit përmes platformës elektronike të KQZ-së, ndërsa procesi monitorohet nga një dhomë operative e përbashkët me përfaqësues të KQZ-së, Prokurorisë së Shtetit dhe Policisë së Kosovës.
Komisioni Qendror i Zgjedhjeve ka paralajmëruar se konferenca e radhës për mediat do të mbahet në orën 11:30, ku do të prezantohen të dhënat e përditësuara mbi pjesëmarrjen në votime dhe ecurinë e procesit zgjedhor.a.b
