Atmosfera në Bulevardin “Dëshmorët e Kombit” është tensionuar këtë mbrëmje, teksa mijëra qytetarë janë mbledhur përpara godinës së Kryeministrisë kundër qeverisë.
Me flamuj kombëtarë dhe pankarta në duar, protestuesit kanë mbushur sheshin përpara institucionit, ndërsa thirrjet “Rama ik!” dhe “Jep dorëheqjen!” gjëmojnë në shesh.
Mes pankartave të shfaqura në protestë ka spikatur edhe një mesazh që i referohet emigracionit masiv të shqiptarëve. “Na përzunë ndër vite, sot të përzejmë ne ty!”, shkruhej në një prej tyre, ku paraqitej edhe figura simbolike e një të riu me mbishkrimin “Diaspora”, përballë siluetave të qyteteve europiane.
Protestuesit e kanë cilësuar tubimin si një moment të rëndësishëm kundërshtimi ndaj qeverisë, duke deklaruar se nuk do të tërhiqen nga kërkesat e tyre.
Gjatë protestës, një qytetar mori fjalën dhe kritikoi bilancin e qeverisë pas 13 vitesh në pushtet, duke ironizuar premtimet e kryeministrit për zhvillimin e vendit.
“Roma nuk bëhet për një ditë, kanë kaluar 13 vite. Cila është Roma jote? Është Roma e kullave të shokëve të tu. Ti do të na përzësh neve dhe të ndërtosh Romën tënde”, u shpreh ai para protestuesve.
Në përfundim të fjalës së tij, qytetari bëri thirrje për vazhdimin e protestës në solidaritet me shqiptarët që janë larguar nga vendi ndër vite.
“Për çdo shqiptar që u detyrua të ikë, ne nuk ikim nga ky shesh”, deklaroi ai, mes duartrokitjeve dhe brohoritjeve të pjesëmarrësve.m,k
